MARINGAL NA KAPISTAHAN NI MARIA, ANG BANAL NA INA NG DIYOS

Antipona sa Pagpasok
Maligayang bati sa'yo, dakilang Ina ni Kristo, sapagkat isinilang mo ang Diyos na naging tao, Hari ng langit at mundo.

Panalangin Pagkatipunan
Ama naming makapangyarihan, pinagpala mo ang sangkatauhan sa iniluwal ng Mahal na Ina. Ipalasap mo sa amin ang kanyang pagdalangin sa pamamagitan ng iyong Anak na isinilang niya para sa amin upang kami'y mabuhay kasama mo at ng Espiritu Santo magpasawalang hanggan.
TAON ABK (Leksiyonaryo: 18)
UNANG PAGBASA
Blg 6, 22-27

Pagbasa mula sa Aklat ng Mga Bilang

Sinabi ng Panginoon kay Moises, "Sabihin mo kay Aaron at sa kanyang mga anak na ito ang ang sasabihin nila sa pagbebendisyon nila sa mga Israelita: Pagpalain ka nawa at ingatan ng Panginoon; nawa'y kahabagan ka niya at subaybayan; lingapin ka nawa niya at bigyan ng kapayapaan. Ganito nila babanggitin ang pangalan ko sa pagbebendisyon sa mga Israelita at pagpapalain ko ang mga ito."

Ang Salita ng Diyos.

SALMONG TUGUNAN
Awit 66, 2-3. 5. 6 at 8

R/. Kami'y iyong kaawaan, pagpalain, Poong mahal.

O Diyos, pagpalain kami't kahabagan,
kami Panginoo'y iyong kaawaan,
upang sa daigdig mabatid ng lahat
ang iyong kalooban at ang pagliligtas.
ang kaharian mo ay mamamalagi."

R/. Kami'y iyong kaawaan, pagpalain, Poong mahal.

Nawa'y purihin ka ng mga nilikha,
pagkat matuwid kang humatol sa madla;
ikaw ang patnubay ng lahat ng bansa.

R/. Kami'y iyong kaawaan, pagpalain, Poong mahal.

Purihin ka nawa ng lahat ng tao,
purihin ka nila sa lahat ng dako.
Ang lahat sa ami'y iyong pinagpala,
nawa'y igalang ka ng lahat ng bansa.

R/. Kami'y iyong kaawaan, pagpalain, Poong mahal.

IKALAWANG PAGBASA
Gal 4, 4-7

Pagbasa mula sa Sulat ni San Pablo sa mga taga-Galacia

Mga kapatid: Noong dumating ang takdang panahon, sinugo ng Diyos ang kanyang Anak. Isinilang siya ng babae, at namuhay sa ilalim ng Kautusan upang palayain ang mga nasa ilalim ng Kautusan. Sa gayun, tayo'y mabibilang na mga anak ng Diyos. Upang ipakilalang kayo'y mga anak ng Diyos, pinagkalooban niya tayo ng Espiritu ng kanyang Anak nang tayo'y makatawag sa kanya ng "Ama! Ama ko!" Kaya't hindi ka na alipin kundi anak. Sapagkat anak, ikaw ay tagapagmana ayon sa kalooban ng Diyos.

Ang Salita ng Diyos.

ALELUYA
Heb 1, 1-2

R/. Aleluya. Aleluya.
N'ong dati'y mga propeta
ngayon nama'y Anak niya
ang sugo ng D'yos na Ama.
R/. Aleluya. Aleluya.

EBANGHELYO
Lc 2, 16-21

✠ Pagbasa mula sa banal na Ebanghelyo ayon kay San Lucas

Noong panahong iyon: Nagmamadali ang mga pastol na lumakad patungong Betlehem at nakita nila sina Maria at Jose, at ang sanggol na nakahiga sa sabsaban. Kaya't isinaysay nila ang mga sinabi ng anghel tungkol sa sanggol na ito; at nagtaka ang lahat ng nakarinig sa sinabi ng mga pastol. Natanim sa isip ni Maria ang mga bagay na ito at kanyang pinagbulay-bulay. Umalis ang mga pastol na nagpupuri sa Diyos at nagpapahayag ng kanyang kadakilaan dahil sa lahat ng narinig nila at nakita na ayon sa ibinalita sa kanila ng anghel. Pagdating ng ikawalong araw ay tinuli ang bata at pinangalanang Hesus -- ang pangalang ibinigay ng anghel bago pa siya ipinaglihi.

Ang Ebanghelyo ng Panginoon.

Panalangin ukol sa Handog
Ama naming Lumikha, sa iyo nagmumula at nagkakaroon ng kaganapan ang tanan. Sa dakilang kapistahang ito ni Maria, na Ina ng Anak mong Diyos na totoo, maipagdiwang nawa namin ang pasimula ng Bagong Taon at paratingin mo kami sa kaganapan nito sa pamamagitan ni Hesukristo kasama ng Espiritu Santo magpasawalang hanggan.

Antipona sa Komunyon
Heb 13, 8
Si Hesukristo ay buhay noon pa mang nakaraan, s'ya rin sa kasalukuyan, s'ya pa rin magpakailanman at magpasawalang hanggan.

Panalangin Pagkakomunyon
Ama naming mapagmahal, loobin mong sa pagdiriwang namin sa dakilang kapistahan ng Mahal na Ina ng iyong Anak at ng iyong sambayanan kaming nagsalu-salo sa piging na banal ay makapakinabang nawa sa iyong buhay sa pamamagitan ni Hesukristo kasama ng Espiritu Santo magpasawalang hanggan.